Байрамкъоялъул хIурматалда
13 январь ккола россиялъул басмаялъул байрамкъо. Гьеб кIодо гьабизе данделъун рукIана цолъизабураб «Гьудуллъи» газеталъул редакциялъул хIалтIухъабиги, штаталда гьечIел мухбирзабиги.
Гьенив данделъи рагьун кIалъазе вахъарав редакциялъул бетIерав редактор МухIамадрасул ШайхмухIамадовас тадбиралда гIахьаллъаразда байрамги баркун, къокъидго бицен гьабуна халкъалда гьоркьоб басмаялъул бугеб кIваралъул, гьеб чара гьечIого хIажатаб, къваригIунеб алат букIиналъул.
Хасавюрт шагьаралда лъабго батIияб мацIалда риччалел газетаз кIудияб квербакъи гьабула шагьаралда, районалда, республикаялда ва тIолабго Россиялда кколел ишазул хIакъалъулъ информация халкъалъухъе заманалда щвезабизе. Газетаз кумек гьабула милаталъул мацIал цIунизеги, умумузул гIадат, гIамал лъималаздаги гIолилазда лъазаризеги. Гьеб гуребги гIемерал цогидалги лъикIал ва пайдаял малъа-хъваял щола газетазул гьурмаздасан цIалдолезухъе.
Редакциялъул штаталда гьечIев мухбир, МВДялъул ветераназул гIуцIиялъул председатель Зайбудин ГIумаровас цIакъго кIудияб къиматги кьун, баркана редакциялъул хIалтIухъабазда гьезул махщалилаб байрам. Бицана журналистасул хIалтIи захIматабги, хIинкъи бугебги, гьебго заманалда къадру-къимат тIокIабги, тIадегIанабги букIиналъул. РакIалде щвезаруна дол хIабургъарал соназ чияр квердасан гIумруялдаса ратIалъарал журналистал.
Жиндирго кIалъаялда гIемерал соназ редакциялда хIалтIарав, гьанже мустахIикъаб хIалхьиялда вугев махщел камилав рагIул устар МухIамад ГIизудиновас, пишацоязда байрамги баркун, цIалана чанго соналъ «НасихIат» газеталда хIалтIарав аваразул машгьурав шагIир, жиндир мунагьал чураяв МухIамад Гунащевасул 85 сон тIубаялде гьабураб пасихIаб кечI.
Аслияб бутIаялдаса хадуб, МухIамадрасул ШайхмухIамадовас гIарцулал шапакъатаздалъун кIодо гьаруна редакциялъулгун тIейгьечIеб бухьен бугел штаталда гьечIел мухбирзаби З. ГIумаров, М. ГIизудинов ва С. Висханов.
Ниязбег АЛМАХЪСКИЙ
