ЖЫГЪАНА ЧЕЧЕК АЧГЪАНДА
Россияны язывчуларыны Союзуну члени кёстекли Муса Шихавовну аты оьтген асруну орталарындан сонг охувчулагъа генг кюйде белгили болма башлады.

Ону башлапгъы шиърулары газетлени, журналланы бетлеринде «Яшыл отдагъы чыкълар» деген ортакъ жыйым китапда басылып чыкъды. «Уят мени юрегимде бюлбюлню», «Гечикген атлы», «Танг сагьатны сырлары», «Яшлыгъымны оьзени», «Ёл учургъан кагъызлар», «Ажжалны иржайыву» деген китаплары къумукъ охувчугъа таныш ва аявлу. «Жыгъана чечек ачгъанда» деген Муса Шихавовну гезикли, еттинчи китабы автор герти дюньягъа гёчгенден сонг охувчуланы къолуна тюшдю.
Гьали-гьалилерде Магьачкъалада Расул Гьамзатовну атындагъы мили китапханада Мусаны «Жыгъана чечек ачгъанда» деген китабыны малим этивюне багъышлангъан чара оьтгерилди.
Эсгерилген китапны айланасында пикру алышдырывгъа жыйылгъан алимлер, жамият чалышывчулар, газетлени, телевидениени вакиллери, шаирни къурдашлары, къардашлары, Кёстек юрт школаны охувчулары, Къумукъ театрны артистлери, йыравлар Муса Шихавовну пагьмусуну таъсири-гючю гьакъда сёйледилер.
Чараны башындан ахырына ерли уста кюйде юрютген филология илмуланы кандидаты Агъарагьим Солтанмуратов белгили адабиятчы, филология илмуланы доктору Малик Гьюсейновгъа сёз бере.
Ол Муса Шихавовну шиъруларындагъы чеберлик аламатланы гьакъында къысгъартып айтды.
Ондан сонг сёз берилген шаир, «Тангчолпан» деген журналны редактору, Муса Шихавовну юртлусу Супиянат Мамаева гиччи заманларында Муса язгъан шиъруланы охуйгъан кюйлерин эсге алды ва ону яратывчулугъунда табиатны гёзеллиги ва къумукълукъ ругь барны айтды. «Шагьаргъа гелгенде, — деп узатды ол сёзюн, — Анварны янына бармай гетмей эди. Китапларына гелген гонорарланы да ол бир де уьюне элтмеген, ювукъларына, къурдашларына харжлагъан. Ожагъын да ол къонакълар учун сакълагъан деме ярай». Супиянат Мамаева ахырда гелеген йыл шаирни 70 йыллыкъ юбилейи болажакъны ва шо агьвалатгъа ол «Тангчолпан» журналны савлай бир номери багъышланажакъны айтды.
Жамият чалышывчу, «Сыкълашыв» деген къурумну башчысы Абсалитдин Мурзаев Мусаны поэзиясындагъы ватандашлыкъ теманы гьакъында айтды.
«Ёлдаш» деген газетни баш редактору, шаир, драматург, прозаик ва журналист Гебек Къонакъбиев Мусаны поэзиясыны теренлиги гьакъда айта туруп, ол тенги ёкъ шаир деди ва Мусаны генерал Ермоловгъа багъышлангъан шиърусун охуду.
«Ёлдаш» газетни къуллукъчусу Яраш Бийдуллаев Муса булангъы ёлугъувларын эсгере туруп, ону гертиликни сюеген хасияты болгъаны гьакъда айтды.

Шу сатырланы автору шаир Муса Шихавовну «Жыгъына чечек ачгъанда» деген китабындагъы асарланы чеберлик аламатлары гьакъда айтды ва ондагъы тенглешдиривлер, къопдурувлар, эпитетлер адабият ахтарывчуланы тергевюн тартып, шаирни адабият варислигини уьстюнде ишлеме гереклер дей туруп: «Мусаны атын даимлешдирмек учун ата юртуну бир орамына ону атын такъма герек, сонг да гелеген йыл Муса ювугъубузгъа 70 йыл болажакъ эди. Шаирни гьюрметлеп, ону яратывчулугъуна багъышлангъан адабият эсделик ахшамлар оьтгерилме герек», — деди.
«Ёлдаш» газетни мухбири, шаир Жават Закавов Муса Шихавовну шиъруларын къайтып-къайтып охуйгъанын ва къумукъ халкъ бар тура туруп, ону шиъруларында охулажакъ, аты да унутулмажакъ деди.
«Ёлдаш» газетни мухбири, «Дагъыстанлы къатын» деген журналны редактору Паху Гьайбуллаеваны сёйлевю даим де йимик жанлы чыкъды. «Оьзю сюйген адамланы Аллагь мангалайындан оьбе дейлер. Муса Шихавов да шолай Аллагь сюйген адамлардан болгъандыр, дагъы ёкъ эссе, шолай даражада язма бажармас эди. Йырчы Къазакъны, Анвар Гьажиевни ругьлары ону юрегинде кесев йимик, сёнмей янып тура болгъангъа гёре, Мусаны яратывчулукъ варислиги энндиден сонг да оьзюне тарта туражакъ», — деди ол.
«Абусупиян» деген басмахананы башчысы, журналист Рашит Гьарунов Муса булангъы аралыгъын айта туруп, ону тез гетивю къумукъ миллетге уллу тас этив деди. Адабият ахтарывчу Магьамматгьанипа Акаевни айтывуна гёре, шаир Муса Шихавов 21-нчи асруну шаири.
Кёстек школаны ана тилден дарс беривчюсю, шаир Супуяханым Бийболатова Мусаны поэзиясыны, ондагъы къылыкъланы эсге алып сёйледи ва огъар багъышлангъан шиърусун охуду.
Муса охугъан Кёстек орта школаны охувчулары да Мусаны шиъруларын арив охума бажардылар.
Мусаны иниси Жалав Шихавов агъач хомуз согъуп, агъасыны йырларын йырлады. Олай да юртлу йырав Арсен Сулеймановну гитара согъуп йырлайгъан кюю тынглавчуланы тергевюн тартды.
Халипат Магьамматова хоншусу Мусагъа багъышлап язылгъан шиъруларын охуйгъан кюй тынглавчуланы къурчун къандырды.
Къумукъ театрны артистлери Папум Мужайытова ва Дагъыстан Республиканы ат къазангъан артисти, Мусаны уланыны ювугъу, Пахурдин Ихивов, шаирни шиъруларын балын-шекерин чыгъарып охуп, тынглавчуланы разилигин къазандылар.
Мусаны иниси Жалав яратывчулукъ эсге алыв ахшамгъа гелгенлени барына да оьзюню разилигин билдирди.
Ахырда Агьарагьим Солтанмуратов шаир Муса Шихавовну «Жыгъана чечек ачгъанда» деген китабын малив этивге байлавлу чараны гьасиллерин чыгъарып сёз айтды.
Магьаррам
АЛИМГЬАЖИЕВ.
«Къумукъ тюз» №47. 2021 йыл.