КЪОЧЧАКЪ ТАНКИСТ
Уллу Ватан давну йылларында Ватаныбызны душмандан азат этме миллионлар булангъы гёнгюллю кюйде фронтгъа гетген совет адамлны арасында дагъыстанлылар да болгъан. Олардан минглер булангъысы орденлер ва медаллар булан савгъатлангъан, 59 адамгъа Совет Союзну Игити деген оьр ат берилген, 7-вю буса Макътавлукъну орденини толу кавалери болгъан.
Дагъыстанлы Элмурза Биймурзаевич Жумагъуловну аты Совет Союзну Игитлерини арасында айрыча белгили. Ватаныбызны харлысызлыгъы учунгъу оьжетли ябушувда къанын-жанын аямай душман булан дав этген игитлени къоччакъ ишлери наслулар бою унутулма тюшмей.
Э. Б. Жумагъулов 1921-нчи йылда Къарланюртда тувгъан. ОСОАВИХИМ, сонггъа таба ДОСААФ жамиятны члени, давгъа гьазирлик гёреген кружоклар Хасавюрт шагьарда ачылагъанны билип, ата юртунда да шолай кружок ачма ёл таба ва шогъар башчылыкъ да эте.
Элмурза Жумагъулов Къызыл Армияны сыдраларына 1940-нчы йылны ноябрь айында чакъырыла ва охув-танк бёлюкге тюше, охувун тамамлагъан сонг 40-нчы танк полкгъа чыгъаралар. 1942-нчи йылны май айында Элмурза Биймурзаевични Ленинград фронтгъа онгаралар. Шо йылны декабрь айында ол младший командирлени гьазирлейген алгъасавлу курсларда охуй ва 1943-нчю йыл январь айда танкны командири этилип белгилене. Э. Б. Жумагъулов Ленинград къамавну йырывда ортакъчылыкъ этген. 1944-нчю йылны август айында Польшаны тахшагьары Варшавадан бронетанковый асгерлени офицер школасына охума бакъдырыла.
Давну биринчи гюнлеринден башлап, ол Украина, Ленинград, Белорус, Гюнбатыш, Брянск фронтлар булан дав эте. Дёрт керен яралангъан танкист, къолай болгъандокъ, душман булан гене къайтып оьжетли кюйде ябуша. Давну йылларында ол 54 танк гьужумларда ортакъчылыкъ этген ва душманны онлар булангъы пушкаларын, 8 оьзлюгюнден юрюйген савутларын дагъытгъан.
Элмурза Биймурзаевич Жумагъуловгъа Уллу Ватан давну йылларында гёрсетген къоччакълыгъы, Ватаныны алдындагъы дав къуллукълары учун Совет Союзну Игити деген оьр ат берилген. Ол Алтын Юлдуз медаль, Ленинни ордени, эки Къызыл Юлдуз орден, Уллу Ватан давну биринчи даражалы ордени, эки Дав Къызыл Байракъ орденлер ва кёп санавдагъы медаллар булан белгиленген.
Давдан сонггъу йылларда шагьарны ва районну экономикасын оьсдюрювде, яшёрюмлени патриот ругьда тарбиялав ёлланы камиллешдиривде ол оьз къошумун болдургъан. 1989-нчу йылда огъар «Хасавюрт шагьарны гьюрметли ватандашы» деген ат берилген. 1944-нчю йыл Белоруссиядагъы Рогачёв шагьарны душманлардан азат этгенлиги учун Элмурза Жумагъулов шо шагьарны гьюрметли ватандашы деген атгъа да лайыкълы болгъан.
Давдан сонггъу йылларда Совет Союзну Игити Элмурза Жумагъулов Дагъыстанны шагьар ва район военкомантларыны комиссары гьисапда загьмат тёкген. Отставкадагъы полковник Элмурза Жумагъулов депутатланы Къарланюрт Советини председатели, ДОСААФ-ны Хасавюрт автошколасыны начальниги болуп ишлей. ДОСААФ-ны шагьар ва республика Советлерини даимлик члени гьисапда ол асгер чагъындагъы яшёрюмлер булан уллу патриот тарбиялав иш юрюте. Ватангъа ва оьз халкъына 70 йылдан артыкъ къуллукъ этген Э. Б. Жумагъуловну эсделигине бизин автошкола шагьар военкомат булан бирликде «Ватанны якъламакъ деген касбу бар» деген темагъа гёре къоччакълыкъны дарсларын оьтгерелер, тюрлю-тюрлю спорт ярышларда асгер чагъындагъы яшёрюмлер оьзлени бажарывлугъун гёрсетелер.
Хасавюртлулар оьз Игитин бек гьюрметлей, абурлай. Уллу Уьстюнлюкню 60 йыллыкъ юбилейине Э. Б. Жумагъуловгъа шагьарда унутулмас эсделик-памятник салынды.
2014-нчю йылда Уьстюнлюкню Гюнюне багъышлангъан шатлы чарада бизин автошколагъа Совет Союзну Игити Элмурза Жумагъуловну аты тагъылды. Булай атгъа бизин автошкола Россияны ДОСААФ-ыны Центральный Советини президиумуну къарары булан лайыкълы болду. Шолай ат булан бирге автошколаны бинасына мемориал такъта да бегетилди.
Мемориал такътаны ачывда Дагъыстан Республиканы Гьукуматыны, ветеран ва яшёрюм къурумланы вакиллери, шагьарны жамияты, Игитни къардашлары оьзлени ортакъчылыгъын болдурдулар. Этилген чакъы бары да чаралар – яшавуну ахырынчы гюнлерине ерли оьсюп гелеген наслуну патриот ругьда тарбиялап, оланы асгер яшавгъа гьазирлемек учун этген къуллукъларын халкъ да, Ватан да унутмагъанлыгъыны шагьаты болуп токътай.
Н. ГЬАЙДАРБЕКОВ, Россияны ДОСААФ-ыны Хасавюрт автошколасыны
начальниги.
«Къумукъ тюз» №45. 2021 йыл.
