МИЛЛЕТИБИЗ УЧУН УЛЛУ ТАС ЭТИВ
Яшав – нечесе яшыртгъын сырлары булагъы тюпсюз-къырыйсыз уллу дерия. Нечакъы ону теренлигин бойлама къарасанг, шончакъы соравлар арагъа чыгъа ва кёплери жавапсыз да къала. Адам тува, оьсе, яшай. Бугюн арабызда чабып-юрюп тургъан адамыбызгъа – тангаласында «гечинген» деген аччы хабар чыгъып къала.
Уллубий Шамшитович Магьамматов да, коронавирус аврув себепли болуп, герти дюньягъа даимликге гёчдю.
Он йылланы узагъында Уллубий Шамшитович оьсюмлюклени карантин этеген Бютюнроссия илму-ахтарыв институтгъа башчылыкъ этип, элибизни оьсюмлюклерде болагъан аврувлардан ва башгъа ерлерден оьсюмлюклер булан гелтирилме болгъан чёп отлардан дазу сакълавчудай къорума бажарагъан касбучу эди.
Ону бай иш сынаву, къурумчулукъ пагьмусу Россельхознадзорну бары да бёлюклери булан аралыкъ тутуп иш гёрме болушлукъ этди. Шогъар буса уллу хозяйствода баш агроном, Дагъыстан Республиканы Юрт хозяйствосуну министерлигинде бёлюкню начальниги, управлениени башчысы, министрни заместители болуп чалышгъаны къол берди деме ярай.
Уллубий Магьамматов алты йыл Монголия Халкъ Республикасында ва эки йыл Халкъ-Демократ Йемен республикада загьмат тёкген.
Уллубий Шамшитовични туврадан-тувра ортакъчылыгъы булан фитосанитария масъалалары халкъара бирлешивню оьлчевюнде чечилегени ону загьматыны теренлигин англатагъан далил болуп токътай. Россельхознадзорну коллегиясыны члени, оьсюмлюклени СНГ-ни ортакъчыларыны арасында карантин этив комиссияны координация Советини председатели «Ватанны алдындагъы къуллугъу учун» деген орденни экинчи даражалы медалы, «Россияны агропромышленный комплексини оьсдюрювдеги къошуму учун» деген алтын медаль, олай да Россельхознадзорну ва Россия Федерацияны Юртхозяйство министрлигини Гьюрметлев грамоталары булан савгъатлангъан.
Уллубий Шамшитович карантин къуллукъну ветеранларыны гьайын этгенден къайры, пагьмулу, гележеги булангъы наслуну да гёз къаравуну тюбюнде гьайын этген.
Уллубий оьз ишин билеген, гьар этилеген ишине яратывчу къайзада янашагъан, оьр даражалы къурумчу, яшавну-къысматны бар кююнде къабул этеген Адам болуп бажаргъандан къайры, талигьине мюкюрлюк этип, айланадагъыланы да оьз дёгерегине жыйып, къурдашларыны яшавуну теренин бойлап, тарыкълы-гьажатлы болгъан гезиклерде ел атгъа мингендей заманында етип геле эди.
Иш ёлдашларына, танышларына савлай миллетине сююв булан бакъгъан Уллубийни уллу ишлери, терен гьакъылы ону таныгъанланы юреклеринде даимликге орун салгъан.
Арабызда болгъур деген адамыбыз гетгенде юреклени солкъ этердей сёзлер де къытап къала экен.
Сыкълашдырма адамланы, миллетни.
Яшадынг сен сююв кёпюр болардай.
Ятгъан еринг нюрлю болсун, сююнюп
Малайиклер къолдан къолгъа алардай.
«Къумукъ тюз» газетни коллективи.
